Jacaylkii iyo Nacaybkii Caasho iyo Cabdi

Waxaan dhowr bilood ka hor la kulmay nin iyo xaaskiis muddo badan isqilaafsanaa. Ninka waxaan ugu yeeraynaa Cabdi, Xaaskana Caasho.
Cabdi iyo Caasho sida ay ii sheegeen waxay is guursadeen ayagoon si fiican isu aqoon. Cabdi wuxuu ku bartay Caasho suuqa Banaadir Mall galab Jimce ah. Barasho yar ka gadaal waxaa bilowday in teleefoonada la is waydaarsado, halkaasna uu ka bilowday xiriir qoto dheer. Haddaanu ka hadalo dhanka Cabdi, wuxuu si run ah u jeclaaday Caasho oo uu u arkay gabar Soomaaliyeed oo ay mustaqbal iyo nolol wada dhisi karaan. Caasho oo dhowr jeer rag hore been u sheegeen ayaa waxay aamintay oraahdii Soomaaliyeed ee oranaysay “Ninkii ku dhali kara ayaa ku dhaqi kara”. In ay nolol la wadaagto nin nolol iyo dhaqaale adduun wax uun ka haystaa waa muhiim ayay aamin.

Cabdi wuxuu u sheegay saaxiibtiis in ugu yaraan dhowr gaari oo Taraagyo u badan dalkan uga shaqeeyaan, isagoowuxuu ka duulaya maahmaahdii ahayd, “Dumar been baa lagu soo xero geliyaa, Runna waa lagu dhaqaa”. Cabdi barasho yar ka gadaal, Caasho si aad ah ayuu u jeclaaday waxayna talo uga dhammaatey in aysan Caasho dhaafin. Wixii uu saaxiib lahaa ayuu isu keenay, waxaana isaga iyo asxaabtiis u howlgaleen sidii ay xilo ugu noqon lahay. Dayn iyo deeq wuxuu heli karay ayaa isu keenay, waxaana Caasho loo sameeyey Aroos aanay weligeed arkin.

Guur iyo aqal gal ka dib ayuu Caasho adeerkeed oo Jiilaal xumi ku habsaday ka soo wacay Soomaaliya, xannuun ba’anna u sheegtay. Caasho wax ma hayso waxayna talo ka gayn –wayday in ay Saygeedii (ninkeedii Cabdi) sida dhaqanku uu yahay ka codsato in uu lacag adeerkeed u diro. Cabdi, in adeerkeed oo dalkii ku jiran lacag u diro ka joogtee ma hayo masruufkeedii. Shaqana isma hayaan dhowr bilood. Wuxuuna go’aansaday in uu arrintaan ka meermeero. Wuxuu hadba yiraahdo berri iyo saadanbe ayaan dirayaa lacagtii, ugu danbayn Caasho waxay u qaadatey in uusan kala jeclay ciddooda iyo waxay jeceshahay intaba.
Caasho carootay markii ay aragtay in Cabdi uusan lahayn dareen. Waxayna qaadatay dharkeedii, una guurtey guri ay lahaayeen qolo qoyskooda ah oo ay filaysay in lagu soo dhawaynayo. Sida dhaqanku yahay Cabdi iyo Caasho waa la dhex galay, lana heshiisii, lacagtiina dir, Caashana reerkeedii bay dib ugu soo laabatay. Cabdina wuxuu u keenay gaari cusub oo uu yiri, “waa xaalmarintaadii”
Caasho gaari cusub ayay sidaas ku qaadatay ayadoo aad u faraxsan. Kana maqsuud ah arooskeedii quruxda badnaa ee uu Cabdi u sameeyay iyo Gaarigan qurxan ee uu hadda siiyay.

Caasho uur-bay habeenkaas halkaas ku qaaday. Laba bil ka dib ayaa iyadoo uur yar leh, sina uga daahsan ballan ay la lahayd takhtarkeeda, dibadda u soo baxday si ay dhakhtarka u aado. Markii ay timid halkuu gaarigeeda yiilay ayay gaarigii halkii ka wayday. Caasho goonyaha ayay eegtay, mase arag gaarigii uu kay-jeclayd u keenay. Si halhaleel ah ayay Booliiska u wacday, una sheegtay in gaarigeedi la xaday.

Markii Booliiska baaray arrintii ayay u sheegeen in aan gaarigii la xadin ee Cabdi bixin waayay lacagtii Gaariga, shirkadii lahaydna dib u jiidatay. Caasho markii ay maqashay warbixintii Booliiska, ayey dib u carootay oo ay ka tagtay Cabdi, ayadoo indhaheeda ay ilmadu ka da’aysana reerkoodi ku noqotay. Caasho oo uur yar lahayd ayaa loo qaatay inay wallacsan tahay, reerkeediina dib u celiyeen oo ay fareen in aanay uga xumaan gaarigii hore oo ay hadda la wadaagto gaarigiisa. Cabdi jacaylkii uu u qabay Caasho oo markaas uur u lahayd, ayuu u keenay set dahab ah oo uu yiri,”Caashooy dahabkan waa xaal marintaada.” Caashana waxay tiri, “Cabdiyoow dahabkan ma sidii gaarigii oo kale baa?” Cabdi wuu iska aamusay. Farxad iyo wanaag ayaa bilaabatay in lagu wada joogo. Bil iyo bar ka dib ayaa Cabdi iyo Caasho oo gurigooda joogo albaabka la soo garaacay. Caasha waxay fiirisay Cabdi waydiisayna in uu cid filayey iyo in kale. Cabdi oo ciyaaraha kubadda cagta aad ugu waallaa ayaa yiri “Maya, macaan. Ma jirto cid aan balansanayn galabta” Caasha way istaagtay, waxayna u dhaqaaqday in ay albaabka furto. Waxay albaabka ka furtay qof dumar ah oo raadinaysa Cabdi.

Caasho oo xiran setkii dahabka oo uu Cabdi u keenay ayaa markay albaabka furtay, la yaabtay naagtan raadineysa Cabdi, iyadoo yara masayr ku jiro ayaa Caasho naagtii ku tiri, “naa ninkeyga maxaad ka raadsaneysaa?” Naagtii ayaa ku jawaabtay,”Dayn-baan ku leeyahay oo dahabkan aad ku xaragooneyso iyo lacag labo boqol ah buu iga soo deensaday, lacagna wali ima uusan siinin, muddadii uu ii qabtayna waa la dhaafay bil iyo bar.” Caasho markaan waxay ku dhawaatay muraaro dillaac. Waxayna iska furtay dahabtii, gacantana u galisay gabadhii sheeganaysay lahaanshihiisa.Caashana sidii ayaa looga qaatay dahabkeedii. Caasho iyo Cabdi dagaal joogto ah ayaa u bilowday. Wanaag badanna derisku kama sheegayn xiriirkooda (deriskaa kula degan). Waxay is jiijiidaanba, sidaas ayey saddex carruur ku dhaleen.

Caasho waxay samayso garan wayday, waxayna go’aansatey in ay shaqo bilowdo Cabdina ku tiri “carruuta hay adigu” Maalmaha aysan Caasho shaqaynina waxay biloowday in ay aaddo aroosyo ama asxaaabteeda. Cabdina ku ciqaabtay in uu guriga iyo caruurta ka shqeeyo. Markuu Cabdi howsha guriga ka soo bixi waayana, Caasho Booliiska ayay ugu yeeri jirtay. Cabdi markii uu Boliiska xiray afar jeer iyo in ka badan ayuu go’aan ku garay in uu iska dhiciyo Caasho, dagaalna isu diyaariyay.

Maalintii danbe ayaa Cabdi oo si isugu buuqsan ay Caasho oo meel u socotaa ku tiri,”Caruurta iyo guriga sii hay Cabdiyoow.” Cabdi wuxuu yiri, “ma hayn karo.” Markaas ayay Caasho ku jawaabtay “hadda guriga ayaad ka baxeeysaa ama boliiska ayaan kuugu wici ee mid dooro Cabdi.” Cabdi markii uu maqlay Booliiska ayuu si aad ah u xannaaqay, go’aanna ku gaaray in uu guriga isaga tago inta wax iska badalayaan. Wuxuu dharkiisii ka qaatay gurigii ay wada deganaayeen, una guuray guri nin saaxiibkiis lahaa. Cabdi wuxuu bilaabay shaqo, wuxuuna Jimce kasta Caasho u gayn jiray labo boqol oo doolar. Saddex bilood ka gadaal ayaa Caasho ii sheegtay in ay ogaatay in Cabdi jeclaa, una sameeyey wax kasta oo xummaan iyo wanaag leh darteed. Caasho waxay soo raadisay Cabdi iyadoo ka codsatay in uu cafiyo. Cabdi halkaas ayuu ku cafiyey Caasho waxaana maanta ka dhexeeya jacayl u dhisan xushmo iyo wanaag.
Waxaa Qoray Mr.Yaxye Cal